Ndee ɗoo deftere, Jaale ngenndi ko deftere fotornde e keewal ɗereeji, ñisnde, to bannge loowdi, alɗunde, addunde toɓɓe keewɗe jowitiiɗe e nguurndam men hannde, weddoriinde kadi naamnde keewɗe fa’de e ɓeen jogorɓe janngoyde nde e huutoroyaade nde. Ko macungel Alla, kooɗangel ganndal, dewngel e duɗe ceertuɗe ciirol : duɗal al Qur’aana, duɗal faraysinkoore e duɗal pulaar, innitortooɗo Aamadu Siidi Bintu Shariif, ganndiraaɗo kadi Aamadu Tijjaani KAN – Tokooso, to Galoya, winndani on ngam yettinde e mon wiɗtooji mum e humpitooji mum teeŋtuɗi, jowitiiɗi e jaŋde e pinal, e faggudu e daartol jaale ngenndi men, ɓe inɗe mumen tacci keeri Duunde men, duunde Afrik. Loowdi wiɗtooji mayre hay huunde furgaani e ngoƴaaji renndo men hannde. Aamadu Tijjaani hoɗii aduna ko caggal jeytaare leydi men seeɗa. Ko o ɓooyɗo liggaade e ɗemɗe ngenndiije, jannguɗo kumpitiiɗo ko fa’ti e pinal e ɓamtaare, sabu o golliima e laamu to bannge dente remooɓe, jannginde ɗumen, heblude ɗumen; ko o wiɗtiyanke, winndiyanke. O wallifiima defte keewɗe : coñte, kelmeendi, doosɗe celluka, defte janngirɗe fannuyankooje. Hannde, omo jeyaa e faamɓe kuccam e paandale naatnugol ɗemɗe ngenndiije e duɗe laamu, sabu o winndii heen defte janngirɗe.